Маалыматтык саясат бөлүмү


Бөлүм жөнүндө 

Жалпы жоболор

Кыргыз Республикасынын Президентинин Аппаратынын маалыматтык саясат бөлүмү (мындан ары – бөлүм) Кыргыз Республикасынын Президентинин (мындан ары – Президент), Кыргыз Республикасынын Президентинин Аппаратынын (мындан ары – Президенттин Аппараты), Кыргыз Республикасынын Президентинин Аппаратынын Жетекчисинин (мындан ары – ПрезиденттинАппаратынын Жетекчиси) жана анын орун басарларынын ишин бөлүмдүн компетенциясына кирген маселелер боюнчакамсыз кылуучу Президенттин Аппаратынын түзүмдүк бөлүмү болуп саналат.

Бөлүм өз ишинде Кыргыз Республикасынын Конституциясын жана мыйзамдарын, Президенттин жарлыктарын жана буйруктарын, Президенттин Аппаратынын Жетекчисинин буйруктарын, Президенттин Аппараты жөнүндө Жобону, Кыргыз Республикасынын башка ченемдик укуктук актыларын жана ушул Жобону жетекчиликке алат.

Бөлүм өз ишин анын компетенциясына берилген маселелер боюнча Президенттин Аппаратынын түзүмдүк бөлүмдөрү, Өкмөттүн Аппараты, Кыргыз Республикасынын Жогорку Кеңешинин Аппараты жана комитеттери, министрликтер, мамлекеттик комитеттер, администрациялык ведомстволор жана мамлекеттик башка органдар менен өз ара тыгыз аракетте жүргүзөт.

 Бөлүмдүн милдеттери жана функциялары

Бөлүмдүн негизги милдеттери болуп төмөнкүлөр саналат:

1) республиканын жарандарын жана эл аралык коомчулукту Президенттин, Президенттин Аппаратынын, Президенттин Аппаратынын Жетекчисинин жана анын орун басарларынын иши жөнүндө маалымдар кылуу;

2) Президенттин, Президенттин Аппаратынын Жетекчисинин жана анын орун басарларынын жалпыга маалымдоо каражаттары (мындан ары – ЖМК) менен байланышын камсыз кылуу;

3) мамлекеттик маалыматтык саясатты түзүүгө катышуу.

Бөлүм негизги милдеттерге ылайык төмөнкүдөй функцияларды аткарат:

1) жалпыга маалымдоо каражаттарына Президенттин иши, мамлекет башчысынын жарлыктары, буйруктары, сүйлөгөн сөздөрү, жолугушуулары жана ал катышкан башка иш-чаралар жөнүндө маалыматтарды берүү;

2) Президенттин расмий сапарларын, жумушчу сапарларын, жолугушууларын, чыгып сүйлөгөн сөздөрүн, ошондой эле республикада жана чет өлкөлөрдө мамлекет башчысы катышкан башка иш-чараларды маалымат жагынан камсыз кылууну уюштуруу;

3) Президенттин ишин толук жана объективдүү чагылдыруу максатында чет өлкөлүк ЖМКлар жана журналисттер менен өз ара аракеттенүүнү жолго коюу;

4) мамлекеттик маалыматтык саясат маселелери боюнча Президентке сунуштарды даярдоо жана аларды ишке ашырууга катышуу;

5) Президенттин коомдук маанилүү чечимдерин маалыматтык коштоо стратегиясын иштеп чыгуу, ошондой эле Президенттин тапшырмасы боюнча аларды ишке ашырууга катышуу;

6) өлкөдө жана чет өлкөдө ири иш-чараларды координациялоо жана маалыматтык коштоо;

7) аткаруу бийлик органдарынын маалыматтык саясат концепцияларын иштеп чыгууга жана жүзөгө ашырууга катышуу;

8) Президенттин дурус кадыр-баркын калыптандырууга жана ЖМКлар аркылуу коомдук жакшы пикирди түзүүгө багытталган иш-чараларга демилгечи болуу жана өткөрүү;

9) Президенттин, Президенттин Аппаратынын, Президенттин Аппаратынын Жетекчисинин жана анын орун басарларынын иши боюнчаЖМКлардын позициясы тууралуу Президентке оперативдүү маалымдоо;

10) Президенттин ишинин маанилүү маселелери жана проблемаларды чечүү боюнча кабыл алган чаралар боюнча калк менен маалыматтык-түшүндүрүү иштерин уюштуруу жана ЖМКлар аркылуу өткөрүү;

11) Президенттин ЖМКлардын өкүлдөрү менен пресс-конференцияларды, брифингдерди, маектешүүлөрдү жана башка жолугушууларын уюштуруу жана өткөрүү;

12) Президенттин ишине байланышкан пресс-релиздерди, маалыматтык бюллетендерди, маалымдама материалдарды, башка маалыматтарды, ошондой эле видео-, фото- жана аудиоматериалдарды даярдоо жана ЖМКларга таркатуу;

13) Президент катышкан иш-чараларды келечектүү жана оперативдүү пландаштырууга катышуу;

14) бөлүмдүн компетенциясына кирген маселелер боюнча өткөрүлгөн жыйналыштарга, кеңешмелерге, конференцияларга жана башка иш-чараларга катышуу;

15) Президент үчүн ЖМКлардагы макалалардын жана билдирүүлөрдүн баяндамасын, ошондой эле маалымкаттарды жана талдоо материалдарын даярдоо;

16) Президенттин ишмердүүлүгүнүн маселелери боюнча, анын ичинде анын ички жана тышкы саясат боюнча позициясын түшүндүрүүчү сүйлөнүүчү сөзүнүн долбоорлорун, маектешүүлөрдү, макалаларды, маалыматтык материалдарды жана тексттерди даярдоо;

17) Президенттин веб-сайтын колдоо, аны өркүндөтүү жана маалымат жагынан туруктуу камсыз кылуу;

18) Президенттин ишинин негизги багыттары боюнча маалыматтык жана башка материалдардын системага салынган фондун, анын ичинде фото-, видео- жана аудиоархивдерди түзүү;

19) кураторлук кылган маселелер боюнча Президентке, Президенттин Аппаратына даректелген каттарды жана башка кайрылууларды карап чыгуу;

20) ЖМКлардын өкүлдөрүн жана басмалардын кызматкерлерин сыйлоо жана кубаттоо жөнүндө сунуштарды киргизүү.

Бөлүмдүн ыйгарым укуктары

Бөлүм өз функцияларын аткаруу үчүн төмөнкүлөргө укуктуу:

1) мамлекеттик органдардан жана башка юридикалык жактардан бөлүмдүн иши үчүн зарыл болгон маалыматтарды белгиленген тартипте суратууга жана алууга;

2) Президенттин Аппаратынын бардык түзүмдүк бөлүмдөрүнөн ЖМКларга жайгаштырууга арналган материалдарды тез арада берүүнү талап кылууга;

3) ЖМКларга чыгууларды, башка маалымат материалдарды жана талдоо маалымкаттарын даярдоо үчүн Президенттин Аппаратынын кызматкерлерин жана адистерин белгиленген тартипте тартууга;

4) ЖМКларда Президенттин ишин чагылдыруу үчүн мамлекеттик органдар менен жергиликтүү өз алдынча башкаруу органдарынын жетекчилиги менен макулдашуу боюнча белгиленген тартипте мамлекеттик органдардын жана жергиликтүү өз алдынча башкаруу органдарынын адистерин тартууга;

5) ЖМКларда Президенттин иши жөнүндө сындап чыгууларга тез арада жооп кылууга;

6) ЖМКлардын өкүлдөрү үчүн окутуу семинарларын, тренингдерди, стажировкаларды уюштурууга;

7) консультациялар үчүн эксперттерди жана адистерди белгиленген тартипте тартууга;

8) журналисттерди аккредитациялоодон өткөрүүгө же андан баш тартууга.

 

Бөлүм жөнүндө Жободон

Бөлүмдүн байланыш телефону: 0 (312) 63 87 82


УСЕНОВ Алмазбек Туратбекович

Маалыматтык саясат бөлүмүнүн башчысы

Басып чыгаруу