Сайттан издөө
Сайттан издөө
Кыргыз Республикасынын Президенти

Алмазбек Атамбаев: «Өлкө спорттогу жаңы эрдиктерди самап турат жана силерди Кыргызстанга чемпион болуп кайтат деп күтөт»

Кыргыз Республикасынын Президенти Алмазбек Атамбаев бүгүн, 26-июлда Кыргыз Республикасынын спорт өкүлдөрүн Рио-де Жанейродо (Бразилия) өтө турган XXXI жайкы Олимп оюндарына узатуу аземине катышты.

Өз сөзүндө Мамлекет башчысы спорт – бул кайрат, дем жана сулуулук деп белгиледи.  “Албетте, Кыргызстанда спорт акырындап кеңири жайылып бара жатканы эң жакшы көрүнүш. Кеп өлкөнүн чоң же кичине, калкынын аз же көп экендигинде эмес. “Күч атасын тааныбайт” дейт элибиз. Мисалы, жакында футбол боюнча Европа чемпионатында 300 миң калкы бар кичинекей өлкө Исландиянын футболчулары Англияны утуп, элин кандай көтөрдү! Бул спортчулардын рухуна, демине байланыштуу болот. Мына ушундай дем, күч-кайрат силердин да ар бириңерде бар. Мен силерге ишенем, силерден үмүттөнөм. Анткени Кыргызстан спорттогу чоң жеңиштерди сагынып,  жаңы эрдиктерди самап турат», - деди Алмазбек Атамбаев.

Мамлекет башчысы кийинки жылдары Кыргызстан спортто да, маданиятта да чоң ийгиликтерге жетише баштаганын беогиледи. Президент бийчи Атай Өмүрзаковдун, “Азия Микс” КВН командасынын, көчө футболу боюнча өлкөнүн кыздар курама командасынын ийгиликтерин атап өттү. “Ар күн, ар ай, жыл өткөн сайын өлкө бутуна бекем туруп, күчкө толо берет”,- деди ал.

«Мен бүгүн силер менен – өлкөбүздүн эң мыкты спортчулары менен жолугуп жатканыма абдан кубанып турам. Анткени Олимп оюндарына жолдомо жеңип алуу эң мыктылардын гана колунан келет. Силер бул ийгиликке ак эмгегиңер менен жетиштиңер. Буйруса, бир нече күндөн кийин Олимп оюндары башталып, 200дөн ашуун өлкөлөр арасында Кыргызстандын желеги да желбирейт! Миңдеген тандалма спортсмендер ичинде биздин 19 кыз-жигиттерибиз жарышка түшөт. Бул баарыбыз сыймыктана турган окуя», - деди Алмазбек Атамбаев.

Мамлекет башчысы үлгү болчу мисалдарды жана өлкөнүн бир кездеги спорттук даңкын эске салды. «Биз кыргызстандык спортчулардын бир кездеги эрдиктерин унутпай алардын даңктуу жолун улантышыбыз керек. Алардын бири – Олимп чемпиону Каныбек Осмоналиев тумар катары силер менен баратат. Биз силердин Олимп чемпиондору болуп, кайтып келишиңерди тилейбиз! Эң башкысы, албетте, силердин Олимп оюндарына катышып жатканыңар. Биз силердин бул ийгилигиңерге кубанабыз. Бирок биз силерден жеңиштерди күтөбүз. Силер Каныбек Осмоналиев, Александр Мелентьев, Татьяна Колпакова, Сатымкул Жуманазаров, Игорь Паклин, Ахмед Анарбаев, Андрей Курнявка, Орзубек Назаров жана башка көрүнүктүү атлеттердин тушундагы кыргыз спортунун даңкын кайрадан чыгарып,  жеңиш менен келишиңерди күтөбүз», - деди Алмазбек Атамбаев.

Президент бардык кыйынчылыктарга карабастан, мамлекет спортко көңүл бура баштаганын белгиледи. «Бир нече жыл мурда биз стипендиялардын көлөмүн көбөйтүүгө аракет жасадык. Бүт өлкөбүз боюнча болочоктогу Олимп оюндарынын катышуучуларын даярдай турган спорт комплекстери курулуп жатат. Албетте, мүмкүнчүлүгүбүзгө жараша сиздер үчүн да жакшы сыйлыктарды камдап койдук. Бул жолу Олимпиада чемпиону болуп келгендерге 7 миллион сом, күмүш медаль алгандарга 5 миллион, ал эми коло медаль уткандарга 3,5 миллион сом байге коюлду. Бирок кеп акчада эмес. Мамлекет, элиңер жана машыктыруучуларыңар силердин ушул күнгө жетишиңер үчүн колдон келгенин жасады. Эң башкысы, Олимпиададан жеңиш менен келсеңер кыргыз эли силерди төбөсүнө көтөрүп, тосуп алат. Урмат-сый, сыйлыктар, белектер, баары болот», - деди Алмазбек Атамбаев.

Мамлекет башчысы кыргызстандыктар спорттук жеңиштерди самап турганын белгиледи. «Бул 2 жыл мурда Дүйнөлүк биринчи көчмөндөр оюнун элибиз кандай кабыл алганынан даана көрүндү. Силер Олимп оюндарынан келген учурда экинчи Дүйнөлүк көчмөндөр оюну башталат.  Бул оюндарга дүйнөнүн бардык тарабынан өкүлдөр келери күтүлүүдө. Бул да Олимп оюндары сыяктуу көчмөндөр арасындагы чоң спорт майрамы болот», - деди Алмазбек Атамбаев.

Президент Алмазбек Атамбаев өлкөнүн эң башкы байлыгы – бул анын жарандары экенин баса белгиледи. «Так ушул силер сыяктуу кайраттуу, кашкөй мүнөз, беттегенинен кайтпаган максаттуу адамдар. Кээде мен өлкөбүздө мунайдын чыкпай калганына шүгүр кылуу керекпи деп ойлойм, анткени, биздин колунан баары келген, өлкөнү көтөрө турган кайратман калкыбыз бар. Өлкөбүз спортто да, эмгекте да жаңы жетишкендиктерди, эрдиктерди самап турат. Мен силерди ийгилик коштоп, ар бириңер медаль тагынып, чемпион болуп, Мекениңерге кайтып келишиңерди каалайм», - деди Алмазбек Атамбаев.

«Силер медалга татыктуусуңар. Мен машыгуулардын канчалык оор иш экенин, канчалык күч-кайратты, мээнетти талап кыларын билем. Көпчүлүк эл спортчуларды медаль тагынып, гимндин жаңырыгы алдында  ардактуу пьедесталда турганда көрүшөт. Ал эми ага чейинки азаптар, сынган сөөк, жанчылган булчуңдар жөнүндө алар билишпейт. Бул Мекенге арналган чоң эмгек. Ошондуктан биз силерге чексиз ыраазыбыз.

Мен таман акы, маңдай териңердин акыбети кайтып, Жаратканым колдоп, жолуңар ачылсын деп тилейм. Биз телевизор алдында бүт дитибиз менен силерге күйөрман болобуз, силерди колдойбуз. Биз силер менен сыймыктанабыз.  Риого сапарыңар байсалдуу болсун! Өлкөңөргө, элиңерге намыс алып келгиле! Кыргызстандыктар силердей уул-кыздарынан жеңиш күтөт жана ишенет!», - деди Алмазбек Атамбаев.

Президент олимпиадалык команданын капитаны Арсен Эралиевге Кыргыз Республикасынын туусун тапшырды.

Салтанаттуу аземдин соңунда Мамлекет башчысы Кыргыз Республикасынын спорт өкүлдөрү менен бирге эстеликке сүрөткө түштү.

 

2016-жыл 26-июль