Сайттан издөө
Сайттан издөө
Кыргыз Республикасынын Президенти

Президент Алмазбек Атамбаев өзгөчө кырдаалдар министри Кубатбек Бороновду кабыл алды

Бүгүн, 2015-жылдын 30-июлунда, Кыргыз Республикасынын Президенти Алмазбек Атамбаев өлкөнүн өзгөчө кырдаалдар министри Кубатбек Бороновду кабыл алды.

Жолугушуунун жүрүшүндө Мамлекет башчысына нөшөрлөгөн жамгырдан улам жана аба-ырайынын кескин ысышына байланыштуу Чүй областынын Аламүдүн, Ала-Арча, Сокулук дарыяларынын, ошондой эле Баткен областынын Кадамжай районундагы Сох дарыясынын деңгээлинин көтөрүлүп кетишине байланыштуу суу жээктерин бекемдөө боюнча көрүлүп жаткан чаралар тууралуу маалымат берилди.

Кубатбек Боронов калыбына келтирүү иштеринин жүрүшү, ошондой эле  Кыргызстандагы дарыялар менен бийик тоолордо жайгашкан көлдөрдүн деңгээлинин көтөрүлүп кетүү коркунучун алдын алуу боюнча аткарылып жаткан чаралар жөнүндө айтып берди.

Тактап айтканда, КРнын өзгөчө кырдаалдар министри маалымдагандай, бийик тоолордо жайгашкан көлдөрдү аэровизуалдык кароо жүргүзүлгөн, натыйжада тоо көлдөрүнүн калыбы туруктуу, учурда суунун нугунан чыгуу коркунучу жок экендиги аныкталган.

Президент Алмазбек Атамбаев Өзгөчө кырдаалдар министрлиги жергиликтүү бийлик жана тургундар менен биргеликте өзөнгө жанаша аймактардын сел алуусун алдын алуу максатында суу жээктерин бекемдөө иштерин ыкчам жана дыкаттык менен аткаруу керектигин баса белгиледи.

Мамлекет башчысы өзгөчө кырдаалдар болуп кетүү коркунучу бар аймактарда жашаган тургундар да түрдүү кесепеттердин алдын алууга даяр болушу керектигин билдирди.

 
2015-жыл 30-июль