Сайттан издөө
Сайттан издөө
Кыргыз Республикасынын Президенти

Президент Алмазбек Атамбаев БУУ Башкы катчысынын саясый маселелер боюнча жардамчысы Мирослав Енчаны кабыл алды

Бүгүн, 2015-жылдын 13-апрелинде, Кыргыз Республикасынын Президенти Алмазбек Атамбаев Бириккен Улуттар Уюмунун Башкы катчысынын саясый маселелер боюнча жардамчысы Мирослав Енчаны кабыл алып, ага «Даңк» медалын тапшырды.

Мамлекет башчысы Мирослав Енчага ал мурда жетектеген Борбордук Азия үчүн превентивдүү дипломатия боюнча региондук борбору жана жалпы алганда БУУ тутуму менен Кыргызстандын бекем жана ийгиликтүү кызматташтыгына кошкон жеке салымы үчүн ыраазычылык билдирди.

Өз кезегинде Мирослав Енча Президент Алмазбек Атамбаевге жогорку медалды тапшырган үчүн ыраазычылык билдирип, муну менен жеке салымы гана эмес, Борбордук Азия үчүн превентивдүү дипломатия боюнча региондук борборунун жана Кыргызстандын мамлекеттик органдарынын биргелешкен иши да таанылгандыгын белгиледи.

Президент Алмазбек Атамбаев Мирослав Енчаны БУУ Башкы катчысынын саясый маселелер боюнча жардамчысы кызматына дайындалышы менен куттуктап, жаңы кызматта ийгиликтерди каалады. “Жаңы кызматта Сиз демократиялык институттарды бекемдөөдө, Борбордук Азия регионунда тынчтыкты жана туруктуулукту сактоодо БУУ менен Кыргызстандын кызматташтыгын активдүү илгерилетүүнү улантасыз деп ишенем”, - деди Алмазбек Атамбаев.

2015-жыл 13-апрель