«Мамлекеттик сатып алуулар жөнүндө» Кыргыз Республикасынын Мыйзамына өзгөртүүлөрдү киргизүү тууралуу» Мыйзамга кол коюлду

Кыргыз Республикасынын Президенти Алмазбек Атамбаев «Мамлекеттик сатып алуулар жөнүндө» Кыргыз Республикасынын Мыйзамына өзгөртүүлөрдү киргизүү тууралуу» Кыргыз Республикасынын Мыйзамына кол койду.

Мыйзам 2016-жылдын 20-октябрында Кыргыз Республикасынын Жогорку Кеңеши тарабынан кабыл алынган.

Мыйзамдын максаты – маданият жана искусство чөйрөсүндөгү зарыл буюмдарды жана кызматтарды түз келишим түзүү жолу менен сатып алуу мүмкүнчүлүгүн берүү болуп саналат.

Бул Мыйзамдын 21-беренесинин 4-бөлүгүнө киргизилген кошумча пунктка ылайык сатып алуучу уюм өз алдынча түз келишим түзүү жолу менен  искусство жана маданият жагындагы чыгармачылык долбоорду же болбосо чыгармачылык иш-аракет үчүн сатып алууларды жүзөгө ашырууга укуктуу болот. Бул өзгөртүүлөр «чыгармачылык долбоор» жана «чыгармачылык иш-аракет» деген сөздөрдү камтыгандыктан, 3-берене чыгармачылык долбоор жана чыгармачылык иш-аракет жөнүндө түшүнүктөр менен толукталат. 

Мыйзам расмий жарыяланган күндөн тартып 10 күн өткөндөн кийин күчүнө кирет.

21-ноябрь, 2016-жыл
Басып чыгаруу