Сайттан издөө
Сайттан издөө
Кыргыз Республикасынын Президенти

Президент Алмазбек Атамбаев менен Грузия Президенти Георгий Маргвелашвилинин ортосунда кеӊейтилген курамдагы сүйлөшүүлөр болду

Кыргыз Республикасынын Президенти Алмазбек Атамбаев  бүгүн, 13-октябрда Грузияга расмий визитинин алкагында  Грузия Президенти Георгий Маргвелашвили менен кеӊейтилген курамда сүйлөшүүлөрдү жүргүздү.

Грузия Президенти өз өлкөсүнө келген Кыргызстан Президентин чын дилинен куттуктап, тарыхый визит деп атады.

«Мен биздин эки тараптуу мамилелерди тереӊдетүү үчүн ушундай мүмкүнчүлүккө ыраазымын», - деди Георгий Маргвелашвили.

Ал коопсуздук, экономика жана билим берүү боюнча келишимдерге кол коюу эки тараптуу катнаштарды тереӊдетүүгө түрткү берерине ишенерин билдирди.

«Ар кайсы саммиттерде жана жолугушууларда президент менен көзмө-көз жолугуп сүйлөшүүгө мүмкүнчүлүгүбүз аз болду. Азыр калыптана баштаган достук мамиле менен ымала биздин өлкөлөр ортосундагы мамлекеттик дагы, маданий жана коомдук дагы деӊгээлде алака-катыштарды жандантат  деп ишенем», - деди Грузия Президенти.

Өз кезегинде Президент Алмазбек Атамбаев жылуу кабыл алганы үчүн Георгий Маргвелашвилиге ыраазылыгын билдирди.

«Мен Тбилисиге келгениме кубанып турам. Шаар, албетте, мага абдан жакты. Ал көп фильмдерден, китептерден көрүп, окуп мен элестеткендей экен. Мен бала чагыман грузин китептерин, ырларын көп окугам. Сиздин кеӊсеге жакын келгенде  Николоз Бараташвилинин эстелиги турат. Эртеден бери символикалык иш чаралар болду, биз курман болгондордун эстелигине гүлчамбар койдук, ошондо мен маркум фронтовик атамды эстедим. Балким, атам мене кошо грузиндер да согушкандыр”, - деди Мамлекет башчысы.

Президент Алмазбек Атамбаевдин белгилешинче, эки өлкөнү көп нерсе байланыштырып турат. “Сиздер менен бирге койгон максттарды ишке ашырууга тийишпиз деп ойлойм.  Андан башка да, сиздерден көп нерсени үйрөнгүбүз келет», - деди Алмазбек Атамбаев.

Сүйлөшүүлөрдүн жүрүшүндө кыргыз-грузин кызматташтыгынын эки тараптуу өз ара иш-аракеттеринин бардык багыттары боюнча актуалдуу маселелер талкууланды.

2016-жыл 13-октябрь