Президент Алмазбек Атамбаевдин Түркмөнстанга, Кувейтке жана Катарга сапарынын жыйынтыктары

Кыргыз Республикасынын Президенти Алмазбек Атамбаев 2015-жылдын 11-15 - декабрында Түркмөнстанга, Кувейтке жана Катарга сапар  менен барып келди.

Түркмөнстанга иш сапар

Грузиянын Президенти Георгий Маргвелашвили менен жолугушуу

Кыргыз Республикасынын Президенти Алмазбек Атамбаев 11-декабрда “Нейтралитет саясаты: тынчтык, коопсуздук жана өнүгүү үчүн эл аралык кызматташуу” эл аралык конференциясына катышуу алкагында Ашхабад шаарында Грузиянын Президенти Георгий Маргвелашвили менен жолугушту.

Жолугушууда Кыргызстан менен Грузиянын ортосундагы эки тараптуу кызматташуунун ар кыл маселелери талкууланды.

Президент Георгий Маргвелашвили Президент Алмазбек Атамбаев менен болгон баардык жолугушуулар достук жана ишеним маанайда  өтөөрүн белгилеп, аны Грузияга расмий визит менен күтөөрүн кошумчалады.

Президент Алмазбек Атамбаев грузин коллегасы менен жолугушууга дайыма кубанычта экендигин белгилеп, Грузияга эмки жылы баруу ниетин билдирди.

Мамлекет башчылары ар кыл тармактагы кыргыз-грузин кызматташтыгын өнүктүрүүнүн маанилүүлүгүн баса белгилешти.

Түркмөнстандын Президенти Гурбангулы Бердымухамедов менен жолугушуу

Кыргыз Республикасынын Президенти Алмазбек Атамбаев 11-декабрда Ашхабад шаарына жасаган иш сапарынын алкагында Түркмөнстандын Президенти Гурбангулы Бердымухамедов менен жолугушту.

Жолугушуунун жүрүшүндө кыргыз-түркмөн кызматташуусунун өз ара кызыкчылык туудурган тармактарындагы маселелер талкууланды.

Президент Алмазбек Атамбаев Түркмөнстандын Президенти Гурбангулы Бердымухамедовго Түркмөнстанга келип, “Нейтралитет саясаты: тынчтык, коопсуздук жана өнүгүү үчүн эл аралык кызматташуу” эл аралык конференциясына катышып кетүүгө чакыргандыгы үчүн ыраазычылык билдирди.

 “Түркмөнстан  БУУ нейтралитетин бекиткен биринчи мамлекет болуп саналат.  Түркмөнстан туура тандоо жасагандыгын акыркы 20 жыл көрсөттү: мамлекет  ийгиликтүү өнүгүп, өзүнүн экономикалык өнүгүшүнө таянып, коңшу өлкөлөргө да колдоо көрсөтө алат”,-деп Мамлекет башчысы Гурбангулы Бердымухамедовго эл аралык конференцияны ийгиликтүү өткөрүшүн каалады.

Өз кезегинде Президент Гурбангулы Бердымухамедов Президент Алмазбек Атамбаевди жылуу кабыл алып, кыргыз-түркмөн мамилелеринин ырааттуу өнүгүп жаткандыгын канааттануу менен билдирди. ”Сиз бул конференцияга келгениңизге кубанычтуумун. Сиздин эл аралык аренадагы көз карашыңыз биз үчүн абдан баалуу. Сиз ар  дайым  демилгелерибизди колдогонуңуз бизди абдан кубандырат. Эл аралык конференцияда регионалдык  жана глобалдык деңгээлде кызматташуу маселелерин талкуулаганга жакшы мүмкүнчүлүктөр болот”,-деди  Гурбангулы Бердымухамедов.

Түркмөнстандын Президенти  Кыргызстанга жасаган мамлекеттик сапары, конструктивдүү диалог жүргүзгөндүгү   тууралуу жакшы эскерүүлөр калгандыгын эске салды. “Эки тараптуу кызматташууну тереңдетүү үчүн биз дагы көп  иштерди жасашыбыз керек”,-деп баса белгиледи ал.

Тараптар  Кыргызстан менен Түркмөнстандын ортосунда  соода-экономикалык жана маданий-гуманитардык кызматташууну мындан ары кеңейтүүгө жана тереңдетүүгө ишенимин билдиришти.

“Нейтралитет саясаты: тынчтык, коопсуздук жана өнүгүү үчүн эл аралык кызматташуу” эл аралык конференциясына катышуу

Кыргыз Республикасынын Президенти Алмазбек Атамбаев 12-декабрда Түркмөнстанга жасаган иш сапарынын алкагында “Нейтралитет саясаты:  тынчтык, коопсуздук жана өнүгүү үчүн  эл аралык кызматташуу” аттуу эл аралык конференциясынын ачылыш аземине  катышты.

Конференция башталаар алдында делегация жетекчилери Түркмөнстандын Нейтралитети монументине гүл коюшту. 

«Нейтралитет саясаты: тынчтык, коопсуздук жана өнүгүү үчүн эл аралык кызматташуу” эл аралык конференциясынын катышуучулары чогуу сүрөткө түшкөн соң, иш-чаранын расмий ачылыш аземи болду.

Конференцияны Түркмөнстандын Президенти Гурбангулы Бердымухамедов салтанаттуу сөз сүйлөө менен ачты.

Конференциянын жүрүшүндө Президент Алмазбек Атамбаев сөз сүйлөдү. Мамлекет башчысы боордош Түркмөнстандын жетекчилигин жана жалпы  түркмөн элин мамлекеттик майрамы – Нейтралитет күнү менен куттуктап, Түркмөнстандын Президентине эл аралык иш-чараны мыкты уюштургандыгы жана меймандостугу үчүн терең  ыраазычылык билдирди.

“Бүгүнкү күнгө Түркмөнстандын дүйнөдөгү кадыр-баркы кыйла өстү. Өлкө мындай жыйынтыкка Түркмөнстандын Президентинин тең салмактуу саясатынын, тең ата өнөктөш катары дүйнөлүк коомчулук менен өз ара жигердүү кызматташуусунун натыйжасында жетишти. Түркмөнстан Бириккен Улуттар Уюму 1995-жылдын 12-декабрында туруктуу нейтралитет статусун  расмий түрдө тааныган дүйнөдөгү  биринчи  мамлекет”,- деп эске салды  Алмазбек Атамбаев.

Президент көп жылдар бою Түркмөнстан аймакта саясый  туруктуулукту сактоо жана колдоп туруу ишинде БУУнун ишенимдүү союздашы жана натыйжалуу өнөктөшү  болуп келе жаткандыгын баса белгиледи. “2007-жылы Борбор Азияда превентивдүү дипломатия боюнча БУУнун аймактык борборунун Ашхабадда ачылышы өлкөнүн тынчтыкты сактоо боюнча аракети таанылгандыгын ырастады”,-деди Алмазбек Атамбаев.

“Бул конференция тынчтыкты сактоочу аянтча болуп саналат. Бул жерде көптөгөн демилгелер көтөрүлөт,- деген Президент, “жакында эле ынак боордош болгон өлкөлөрдүн эки тараптуу мамилесиндеги кыйынчылыкты курчутууну токтотууга, өнөктөштүк, кошуналык жана достук жылуу мамилелерди калыбына келтирүүгө” чакырган Белорусиянын Президенти Александр Лукашенконун Россия менен Түркияга карата  чакырыгын колдоорун кошумчалады.

Мамлекет башчысы белгилегендей, Түркмөнстандын нейтралитет саясаты  түркмөн элинин кылымдар бою калыптанган салттарына, дүйнө таанымына, көз карашына жана ынанымына тыгыз байланыштуу. Эзелтен түркмөн эли тынчтыкты сүйгөн, чыдамдуулук жана урматтоо сыяктуу сапаттарды кастарлап келген.

“Кыргыз-түркмөн өз ара пайдалуу кызматташуусу элдерибиздин жана мамлекеттерибиздин ортосундагы тарыхый жактан калыптанган бир туугандык мамилелерге, тагдырларыбыздын жана кызыкчылыктарыбыздын, тилдин жана маданияттын, салттардын жана үрп-адаттардын, руханий дөөлөттөрүбүздүн жалпылыгына негизделген”,-деди Алмазбек Атамбаев.

Президент Алмазбек Атамбаев Түркмөнстандын Президенти Гурбангулы Бердымухамедовдун өлкөбүзгө жасаган мамлекеттик сапарынан кийин  Кыргызстан менен Түркмөнстандын  ортосундагы өз ара мамилелер сапаттык жаңы деңгээлге  көтөрүлүп жаткандыгын баса белгиледи.

“Өткөн 20 жылга  көз чаптырып келип, Түркмөнстан тандап алган нейтралитет жолу абдан туура тандоо болгон деп ишенимдүү айтсак болот”,-деген Алмазбек Атамбаев Түркмөнстандын Президенти Гурбангулы Бердымухамедовго чың ден-соолук, ички жана тышкы саясатта масштабдуу реформаларды ишке ашырууда ийгиликтерди, ал эми боордош Түркмөнстан элине – жаркыраган келечек, туруктуу өнүгүү жана экономикалык гүлдөө  каалады.

Эл аралык конференциянын ачылыш аземи аяктагандан кийин Президент  Алмазбек Атамбаев  расмий визит менен Кувейт Мамлекетине жөнөдү.

Кувейт Мамлекетине расмий сапар

Кувейттин Биринчи вице-премьер-министри Шейх Сабах Халед Аль-Хамад Аль-Сабах менен жолугушуу

Кыргыз Республикасынын Президенти Алмазбек Атамбаев 13-декабрда Кувейт Мамлекетине расмий визитинин алкагында Кувейттин Биринчи вице-премьер-министри, тышкы иштер министри, Араб Экономикалык өнүктүрүү Кувейт фондунун төрагасы Шейх Сабах Халед Аль-Хамад Аль-Сабах  менен жолугушту.

Жолугушуунун жүрүшүндө Кыргызстан менен Кувейттин ортосундагы инвестициялык, соода-экономикалык, маданий-гуманитардык жана туристтик чөйрөлөрдө кызматташуу маселелери, ошондой эле  аймактык жана эл аралык маселелердин олуттуу аспектилери талкууланды.

Президент Алмазбек Атамбаев  кувейт  тарапка Кувейтке расмий визит менен келип кетүүгө чакыргандыгы үчүн ыраазычылык билдирди. Мамлекет башчысы ошондой эле  жылуу кабыл алгандыгы жана меймандостугу  үчүн ыраазычылык айтып, Шейх Сабах Халед Аль-Хамад Аль-Сабахты келерки жылы сапар менен Кыргызстанга келип кетүүгө чакырды.

Президент кувейт тарапты Кыргызстан менен Кувейттин ортосундагы кызматташууну активдештирүүгө чакырды.

Кувейттин биринчи вице-премьер-министри Шейх Сабах Халед Аль-Хамад Аль-Сабах өз кезегинде Кыргыз Республикасынын Президенти Алмазбек Атамбаев менен жолугушуп жаткандыгына кубанычтуу экендигин белгиледи.

Ал Президент Алмазбек  Атамбаевдин сапарынын алкагында эки тараптуу бир катар документтерге кол коюу каралгандыгын эске салды. “Бул макулдашуулар  Кыргызстан менен Кувейттин ортосундагы эки тараптуу мамилелерди активдештирүүгө өбөлгө болот”,- деди Шейх Сабах Халед Аль-Хамад Аль-Сабах.

Кувейттин Биринчи вице-премьер-министри ошону менен бирге  13-декабрда Кувейтте өтө турган кыргыз-кувейт инвестициялык форум  Кыргызстан менен Кувейттин бизнес-түзүмдөрүнүн байланыштарын тереңдетүүгө жакшы мүмкүнчүлүктөрдү  берээрин  баса белгиледи.

Кувейт Мамлекетинин Улуттук Ассамблеясынын Төрагасы Марзук Аль-Ганем менен жолугушуу

Кыргыз Республикасынын Президенти Алмазбек Атамбаев 13-декабрда Кувейт Мамлекетинин Улуттук Ассамблеясынын Төрагасы Марзук Аль-Ганем менен жолугушту.

Жолугушуунун жүрүшүндө Марзук Аль-Ганем Президент  Алмазбек Атамбаевди Кувейттин парламентинин жана депутаттарынын атынан жылуу кабыл алды.

Улуттук Ассамблеянын Төрагасы Мамлекет башчысына  Кувейттин парламентинин ишмердиги, анын мүмкүнчүлүктөрү жана өлкөнүн өнүгүшүнө таасири  тууралуу айтып берди. “Биз кыргыз-кувейттик эки тараптуу мамилелерди активдештирүү боюнча бардык демилгелерди колдооого даярбыз. Биз Кыргызстанга багытталган ишке ашырылып жаткан  бардык долбоорлорду жана инвестицияларды колдойбуз”,- деди Кувейт Мамлекетинин Улуттук Ассамблеясынын Төрагасы.

Марзук Аль-Ганем  ошондой эле Президент Алмазбек Атамбаевдин сапары Кыргызстан менен Кувейттин ортосундагы мамилелерди активдештирүүгө  түрткү берээрине ишенимин билдирди.

Президент Алмазбек Атамбаев  өз кезегинде  Кыргызстанга тартылып жаткан ишке ашырылып жаткан  кыргыз-кувейттик долбоорлорду жана инвестицияларды колдоо тууралуу ниети үчүн Кувейт парламентине ыраазычылык билдирди. “Биз Сизди Кыргызстанга сапар менен келип кетет деп күтөбүз”,- деди Алмазбек Атамбаев. 

Мамлекет башчысы Кыргызстан  парламенттик демократия жолун тандап алгандыгын жана  мындан ары дагы бул багытта  өнүгүүгө ниеттенгендигин баса белгиледи.

Кувейт Мамлекетинин Премьер-министри Шейх Джабер Мубарак Аль-Хамад Аль-Сабах менен жолугушуу

Кыргыз Республикасынын Президенти Алмазбек Атамбаев 2015-жылдын 13-декабрда Кувейт  Мамлекетинин Премьер-министри Шейх  Джабер Мубарак Аль-Хамад Аль-Сабах менен жолугушту.

Жолугушуунун жүрүшүндө Шейх Джабер Мубарак Аль-Хамад Аль-Сабах Президент Алмазбек Атамбаевдин сапары ийгиликтүү өтөт деген ишенимин билдирди. “Сиз  Кувейтке расмий сапар менен келгениңизге кубанычтуумун”, - деди ал.

Мамлекет башчысы өз кезегинде кувейт тарапка жылуу кабыл алгандыгы үчүн ыраазычылык билдирди. “Өлкөлөрүбүз үчүн өз ара кызыкчылык туудурган долбоорлорду чогуу ишке ашыра алабыз деп ишенем. Ошондой эле Кувейт бизнесмендеринин Кыргызстанга келишин күтөбүз”,-деди Алмазбек Атамбаев.

Жолугушуунун жүрүшүндө тараптар кыргыз-кувейттик кызматташуунун өз ара кызыкчылык туудурган түрдүү тармактарында кызматташуу маселелерин талкуулашты.

Кувейт Мамлекетинин Эмири Шейх Сабах Аль-Ахмад Аль-Джабер Аль-Сабах менен жолугушуу

Кыргыз Республикасынын Президенти Алмазбек Атамбаев 13-декабрда Кувейт Мамлекетине расмий визитинин алкагында Кувейт  Мамлекетинин Эмири Шейх Сабах Аль-Ахмад Аль-Джабер Аль-Сабах менен жолугушту.

Жолугушуунун жүрүшүндө Кувейт  Мамлекетинин Эмири Президент Алмазбек  Атамбаевди  жана Кыргызстан делегациясын жылуу кабыл алды.  

Президент Алмазбек Атамбаев Кувейттин  Эмирине меймандостугу үчүн ыраазычылык билдирип, жооп иретинде Кыргызстанга сапар менен келип кетүүгө чакырды.

Шейх Сабах Аль-Ахмад Аль-Джабер Аль-Сабах  келерки жылы Кыргызстанга келип кетүү ниетин билдирип, республикага жана өлкөнүн элине гүлдөп өнүгүү жана бакубатчылык каалады.

Жолугушуунун жүрүшүндө тараптар Кыргыз Республикасы менен Кувейт Мамлекетинин ортосунда эки тараптуу кызматташууну кеңейтүүгө кызыкдар экендигин билдиришти.

Андан тышкары Шейх Сабах Аль-Ахмад Аль-Джабер Аль-Сабах  эки мамлекеттин министрлеринин деңгээлинде Кыргызстан менен Кувейттин ортосундагы түрдүү чөйрөлөрдө кызматташууну тереңдетүү маселелери боюнча деталдуу талкуу өткөрүүнү сунуштады.

Сүйлөшүүлөрдүн жыйынтыгы боюнча  мамлекет башчыларынын катышуусунда төмөндөгү документтерге кол коюлду:

- Кыргыз Республикасынын Өкмөтү менен Кувейт Мамлекетинин Өкмөтүнүн ортосунда кирешеге жана капиталга кош салык салуудан качуу  жана салык салуудан четтөөнү болтурбоо жөнүндө макулдашуу;

- Кыргыз Республикасынын Өкмөтү менен Кувейт Мамлекетинин Өкмөтүнүн ортосунда экономикалык жана техникалык кызматташтык жөнүндө макулдашуу;

- Кыргыз Республикасынын Өкмөтү менен Кувейт Мамлекетинин Өкмөтүнүн ортосунда инвестицияларды колдоо жана өз ара коргоо жөнүндө макулдашуу;

- Кыргыз Республикасынын Өкмөтү менен Кувейт Мамлекетинин Өкмөтүнүн ортосунда Кыргыз Республикасынын дипломатиялык жана кызматтык паспортторунун ээлерин Кувейт Мамлектинин визалык талаптарынан бошотуу жөнүндө макулдашуу;

-   Кыргыз Республикасынын Өкмөтү менен Кувейт Мамлекетинин Өкмөтүнүн ортосунда аба катнашы жөнүндө макулдашуу;     

-  Эки тараптуу консультациялар боюнча Кыргыз Республикасынын Тышкы иштер министрлиги менен Кувейт Мамлекетинин Тышкы иштер министрлигинин ортосунда  өз ара түшүнүшүү жөнүндө меморандум.   

Кыргыз-кувейт инвестициялык форумунун биринчи жыйынынын ачылышына катышуу

Кыргыз Республикасынын Президенти Алмазбек Атамбаев  13-декабрда Кувейт Мамлекетине жасаган расмий визитинин алкагында кыргыз-кувейт инвестициялык форумунун биринчи жыйынынын ачылышына катышты.

Кыргыз-кувейт инвестициялык форумунун жыйынын  Кувейттин Соода-өнөр жай палатасынын вице-президенти Абдульвахаб Мохаммад Абдулла Абуль-Хасан ачты.

Өз сөзүндө Кувейттин Соода-өнөр жай палатасынын вице-президенти Кыргызстан менен Кувейттин ортосундагы соода жүгүртүүнүн көлөмүн көбөйтүү зарылчылыгын белгиледи. “Эки өлкөнүн ортосундагы мамилелер зор потенциалга ээ. Кыргыз Республикасынын Президентинин расмий визити

кыргыз-кувейт  кызматташуусун өнүктүрүүгө жаңы дем берет”,- деп Абдульвахаб Мохаммад Абдулла Абуль-Хасан  туризм, экономика жана инвестиция тартуу чөйрөлөрүндө  кызматташууну өнүктүрүү мүмүкүнчүлүктөрү бар экендигин кошумчалады.

Андан кийин Президент Алмазбек Атамбаев  куттуктоо сөз  сүйлөдү. Мамлекет  башчысы  Кыргызстанда  туруктуу өнүгүү үчүн бардык шарттар түзүлгөндүгүн белгиледи. “Акыркы  төрт жылда Кыргызстанда туруктуулук орноп, өлкөбүз өзгөрдү. Ири инвестициялар келе баштады. Биз эми араб өлкөлөрүнөн инвесторлордун тобун күтүп жатабыз. Кыргызстан оор сыноолорду баштан кечирди: биз эки революциядан өттүк. Араб өлкөлөрүндө жана Украинадагы азыркы абалдан биз эки ирет өттүк. Бирок бүгүн өлкөдө туруктуулук орногон. Акыркы төрт жылдын аралыгында бюджеттин киреше бөлүгү дээрлик үч эсеге өстү, өлкөдө либералдуу мыйзамдар кабыл алынган”,-деди Алмазбек Атамбаев.

Президент  ошону менен бирге  Кыргызстандын  кереметтүү жаратылышы жана өлкөнүн мүмкүнчүлүктөрү туурасында айтып берди. “Кыргызстан – кен байлыктарга бай кереметтүү өлкө: бизде түстүү металлдын мол запасы бар. Кыргызстан  - мөңгүлөрдүн өлкөсү жана  чоң дарыялардын башатында жайгашкан. Ошондуктан  өлкөбүздө гидроэлектростанцияларды курууга болот”,-деп Алмазбек Атамбаев кувейттик бизнесмендерди  Кыргызстанды өз көзү менен көрүп,  түрдүү долбоорлорго инвестиция салуу мүмкүнчүлүктөрүн  изилдеп көрүүгө чакырды.

“Кыргызстан  Орто Азиянын  борбордук бөлүгүндө жайгашкан. Ошондуктан биздин өлкөбүздү Борбордук Азиянын жүрөгү деп атасак болот. Инвесторлор бизге келип жатышат жана келе берет. Бирок биз  араб мамлекеттеринен  инвесторлорду көрүүгө кызыкдарбыз”,-деди Президент.

Президент Алмазбек Атамбаев Кыргызстан Евразиялык экономикалык бирликке мүчө болушу  Кыргызстан менен Кувейттин ортосундагы кызматташуу үчүн реалдуу мүмкүнчүлүктөрдү ачаарын баса белгиледи. “Кыргызстан бизнеске инвестиция салуу үчүн жакшы башталгыч  аянтча болуп саналат. Анткени  өлкөбүз  1,5 млрд. калкы бар Кытай менен чектешет, ошондой эле дээрлик 200 миллиондук өткөрүү рыногу бар бирликтин мүчөсү болуп саналат.  Кыргызстанда өндүрүлгөн товарларды пошлинасыз Россияга, Казакстанга жана Беларусиянын  рынокторуна  жөнөтсө болот”,-деп чечмеледи Мамлекет башчысы.

“Биз кувейттик бизнесмендерге зарыл бардык шарттарды түзүүгө  даярбыз. Мен Кыргызстандын келечегине  ишенем, форумдун жыйынтыгы менен Кыргызстан  кувейттик достордун арасынан жаңы өнөктөштөрдү табат деп ойлойм”,- деди Президент.

Кыргыз-кувейт инвестициялык форумунун алкагында  Кувейт Мамлекетинин Соода-өнөр жай палатасы менен Кыргыз Республикасынын Соода-өнөр палатасынын ортосунда өз ара түшүнүшүү  жөнүндө меморандумга   кол коюу аземи өткөрүлдү.

Иш чаранын жүрүшүндө  Кыргыз Республикасынын экономика министрлигине караштуу инвестицияларды илгерилетүү боюнча агенттиктин директору Алмаз Сазбаков сөз сүйлөп, Кыргызстандын  инвестициялык мүмкүнчүлүктөрү туурасында бет ачар өткөрдү.

Андан соң инвестициялык форум “суроо-жооп” форматында өттү.

Кыргызстандын Кувейттеги Элчилигинин ачылыш аземине катышуу

Кыргыз Республикасынын Президенти Алмазбек Атамбаев 14-декабрда Кувейт Мамлекетине расмий сапарынын алкагында  Кыргыз Республикасынын Кувейт Мамлекетиндеги Элчилигинин ачылыш аземине катышты.

Мамлекет башчысы өлкөнүн дипломатиялык өкүлчүлүгүнүн  имаратын көрүп чыгып, Кыргыз Республикасынын Кувейт Мамлекетиндеги Элчилигинин кызматкерлери менен жолугушту.

Дипломатиялык өкүлчүлүктүн ачылыш аземине ошондой эле  Кувейт Мамлекетинин Биринчи вице-премьер-министри, тышкы иштер министри Шейх Сабах Халед Аль-Хамад Аль-Сабах жана Кыргыз Республикасынын тышкы иштер министри Эрлан Абдылдаев дагы катышышты.

Элчиликтин ачылыш аземинен  кийин Мамлекет башчысы Катар Мамлекетине иш сапар менен жөнөп кетти.

Кувейт Мамлекетинин Эмири Шейх Сабах Аль-Ахмад Аль-Джабер Аль-Сабахтын катышуусу менен Президент Алмазбек Атамбаевди расмий узатуу аземи

Кыргыз Республикасынын Президенти Алмазбек Атамбаевдин Кувейт Мамлекетине жасаган расмий визитинин алкагында 14-декабрда Кувейт Мамлекетинин Эмири Шейх Сабах Аль-Ахмад Аль-Джабер Аль-Сабахтын катышуусу менен Мамлекет башчысын расмий узатуу аземи өткөрүлдү.

Президент Алмазбек Атамбаевди расмий узатуу аземинин жүрүшүндө Кыргыз Республикасынын жана Кувейт Мамлекетинин гимндери аткарылды, андан соң Мамлекет башчылары Ардактуу кароолдун ротасынын  катарын кыдырып чыгышты.

Андан кийин Президент Алмазбек Атамбаев Катар Мамлекетине иш сапар менен жөнөп кетти.

Катар Мамлекетине иш сапар

Катардагы билим берүү, илим жана коомду өнүктүрүү Фонду жана “Билим шаарчасы” комплекси менен таанышып чыгуу

Кыргыз Республикасынын Президенти Алмазбек Атамбаев  14-декабрда Катар Мамлекетине иш сапарынын алкагында Катардагы билим берүү, илим жана коомду өнүктүрүү Фондуна барып, “Билим шаарчасы” (Билим берүү) комплекси менен таанышып чыкты.

Фонд менен таанышуу учурунда Мамлекет башчысына Билим берүү, илим жана коомду өнүктүрүү фондунун ишмердиги жөнүндө бет ачар өткөрүштү.

Андан кийин Президент Алмазбек Атамбаев  Фонддун штаб-квартирасы менен таанышты, “Билим шаарчасы” (Билим берүү) комплексин көрүп чыгып, Фонддун эстелик китепчесине өз каалоосун жазып калтырды. 

Маалымдама: Катардагы билим берүү, илим жана коомду өнүктүрүү Фонду 1995-жылы Катардын Эмири Шейх Хамад Бен Халиф Аль Танинин Жарлыгы менен түзүлгөн.  Анын негизги максаты  –  Катардын бардык жарандарына сапаттуу билим алууга бирдей мүмкүнчүлүктөрдү камсыз  кылуу, Катардагы билим берүүнү, инновациялык изилдөөлөрдү  дүйнөлүк деңгээлге жогорулатуу. Диабетке каршы күрөшүү боюнча Катардын Ассоциациясын жана 1995-1996-жылдары социалдык өнүктүрүүнүн борборун түзүү Фонддун алгачкы долбоорлорунан   болуп калды.

Фонддун штаб-квартирасы Доха шаарындагы 2003-жылы ачылган “Билим шаарчасында” жайгашкан.

Илимий шаарчасынын  жалпы аянты 100 миң чарчы метр.  Шаарчанын мүнөздүү айырмачылыгы –  анын түзүмдөрү  өз тармагында дүйнөлүк лидер болгон билим берүү борборлорунун филиалдарын гана камтыйт. Шаарчада  дүйнөгө белгилүү университеттердин алты бөлүмү жайгашкан, аларда дүйнө өлкөлөрүнөн келген студенттер билим алат.

“Билим шаарчасы”  Катардын жана жалпы эле Жакынкы Чыгыштын илимий-билим берүү, педагогикалык жана маданий борборлорунун бири болуп эсептелет.

Катардын Эмири Тамим Бин Хамад Аль Тани менен жолугушуу

Кыргыз Республикасынын Президенти Алмазбек Атамбаев 15-декабрда Катар Мамлекетине жасаган иш сапарынын алкагында Катар Мамлекетинин Эмири Тамим Бин Хамад Аль Тани менен жолугушту.

Жолугушуунун жүрүшүндө Катардын Эмири Тамим Бин Хамад Аль Тани Президент Алмазбек Атамбаевди жылуу кабыл алып, кыргыз-катардык  мындан аркы кызматташуунун маселелерин талкуулоо үчүн экинчи ирет жолугушуу мүмкүнчүлүгүнө кубанычта экендигин белгиледи.

Президент Алмазбек Атамбаев  өз кезегинде Эмир Тамим Бин Хамад Аль Таниге  жылуу кабыл алгандыгы үчүн ыраазычылык билдирип, Кыргызстанда жүргүзүлүп жаткан реформалар, акыркы жылдары өлкө жетишкен ийгиликтер туурасында баяндап берди.

Жолугушуунун жүрүшүндө  түрдүү чөйрөлөрдөгү эки тараптуу кызматташуунун актуалдуу маселелери талкууланды.

Андан кийин жолугушуу «бетме-бет» форматында өттү.

 

18-декабрь, 2015-жыл
Басып чыгаруу