Сайттан издөө
Сайттан издөө
Кыргыз Республикасынын Президенти

Президент Садыр Жапаров Советтик аскерлердин Афганистандан чыгарылган күнүнө байланыштуу кайрылуу жолдоду

Кыргыз Республикасынын Президенти Садыр Жапаров бүгүн, 15-февралда, Советтик аскерлердин Афганистандан чыгарылган күнүнө байланыштуу кайрылуу жолдоду.

 «Урматтуу афган согушунун катышуучулары!

Салтка айланып калгандай эле, биз ар жылдын 15-февралында афган жериндеги согушта курман болгон интернационалист жоокерлерди эскерүү күнүн белгилейбиз.

Афган согушу 9 жыл, 1 ай жана 19 күнгө созулган. Бул жылдарда Афганистанда Советтик Армиянын 620 миң аскер кызматчысы, алардын ичинде жети миңден ашуун кыргызстандык өз милдетин өтөшкөн.

Кайратмандыгы, эрдиги жана каармандыгы үчүн эки жүз миңден ашык аскер кызматчылары, жумушчулар жана кызматчылар СССРдин орден, медалдары менен сыйланышкан. 66 аскер кызматчысы Советтер Союзунун Баатыры наамына татыктуу болушкан. Алардын ичинде биздин эки жердешибиз Сергей Гущин менен Юрий Исламов да бар.

Интернационалист жоокерлер согушуп эле тим болбостон, Афганистанды калыбына келтирип, азык-түлүк, медициналык каражаттар менен камсыздашып, социалдык объекттерди курушкан.

Афганчы-жоокерлер бүгүн дагы өзүнүн жарандык милдеттерин ар-намыстуулук менен аткарышып, өлкөбүздүн ардагердик кыймылынын өнүгүшүнө салымдарын кошуп келишет. Алар өздөрүнүн куралдаш жолдошторуна жардам көрсөтүү боюнча алгылыктуу иштерди аткарып, патриоттук иштерди алып барышып, Мекенди коргоочулардын жаш муунун даярдап жатышат.

Советтик аскерлердин чектелген контингентинин Афганистандан чыгарылышынын 32 жылдыгына байланыштуу бардык интернационалист ардагерлерге, алардын туугандарына жана жакындарына бекем ден соолук, бакубат турмуш жана ийгиликтерди каалайм».

2021-жыл 15-февраль